أهلا يابنوتات كل سنه وانتم بألف خير وصحة وسعادة دايما يارب .. ويارب المريض أشفيه والمهموم فرج همه واللى فيكم فرحان زود فرحته يارب وتممها ليه على خير يارب ويارب زيل الغمه عن أمتنا وأحفظ بلادنا العربيه من المتآمرين اللهم أمين :) أنا عارفه طولت عليكم بس معلش برضو دول دعوتين حلوين ويستاهلوا .. المهم ، كل سنه وانتم طيبين خلاص طبعا العيد على قدوم أهو وأحلى فرحة فى العيد هى فرحة عمايل الكحك والبسكويت والبيتى فور والذى منه طبعا أنتوا عارفين وأهم حاجة فى ده كله أغنية أم كلثوووووم فى ليلة العيد .. النهاردة بقى أنا عليا طريقة الكحك وأنتم عليكم الأغنية هههههههههه .. مش هطول عليكم هدخل فى الموضوع على طووووووووووول ..يلا استعدى وشمرى علشان نعمل مع بعض كحك العيد :)
*المقادير:-
واحد كيلو دقيق + اتنين كوب سمن أو زبدة + كوب حليب + ثلاث ملاعق كبيره سمسم + اتنين ملعقه صغيرة بيكنج بودر + اتنين ملعقه صغيره رائحة كحك + مقدار ملح + مقدار حشو (عجوة أو ملبن أو عين جمل / زى ماتحبى)
*الطريقه:-
أولا نضرب السمن بالمضرب حتى ينعم ثم نضيف الحليب مع الاستمرار فى الضرب حتى يتجانس قوام الخليط ثم نضع على الدقيق البيكنج باودر والملح ، ونرش فوقه السمسم ورائحة الكحك ، ثم نقوم بصب خليط الحليب بالسمن الذى قمنا بخلطه مسبقا بأستمرار على خليط الدقيق ونعجن حتى نحصل على عجينه يمكن تشكيلها ، وهنا تنتهى مرحلة صنع العجين تمام كده ..ندخل بقى على مرحلة تشكيل العجين وحشوه .. خليكى معايا واتبعى الخطوات دى كويس أوى.. تقطع العجينه الى كرات متساويه ثو نأتى بقطع صغيره من الحشو بس متكونش صغيره أوى لأ يكون حجمها مناسب للحشو ونقوم بحشو كرة العجين المعدة مسبقا ثم نضرب على الكرة بلطف حتى تصبح ذو سطح مستوى وبعدين نقوم بنقش الكحك كما نحب ونفضل وأيضا أنتى غير مقيدة بصنع الكحك على شكل دائرى فقط ولكن من الممكن ان تكون الكحكه على شكل قلب أو نجمه أو شكل بيضاوى وده كله بيرجع لأبداعك أنتى يابنوته
تعليقات
إرسال تعليق